ऐन पावसाळ्यात जमिनीतून
पाच फूट वर आली पाइपलाइन!
कटापूर योजनेच्या निकृष्ट कामाचा पर्दाफाश
शेतकऱ्यांचे मोठे नुकसान
संतोष शिराळे | सातारा
सातारा जिल्ह्यात सध्या मुसळधार पाऊस सुरू असताना विकासकामांच्या दर्जाचा बुरखा फाडणारी धक्कादायक घटना समोर आली आहे. श्री जरंडेश्वर साखर कारखाना परिसरात कटापूर पाणीपुरवठा योजनेअंतर्गत जमिनीखाली टाकण्यात आलेली पाइपलाइन ऐन पावसाळ्यात थेट पाच फूट जमिनीवर उचलली गेली आहे. सततच्या पावसामुळे माती वाहून गेल्याने संपूर्ण कामाचा निकृष्ट दर्जा उघड झाला असून परिसरातील शेतकऱ्यांच्या शेतीचे व पिकांचे मोठे नुकसान झाले आहे. कोट्यवधी रुपये खर्च करून उभारण्यात आलेल्या योजनेची अशी अवस्था झाल्याने संबंधित कंत्राटदार आणि कामाची देखरेख करणाऱ्या यंत्रणेवर गंभीर प्रश्नचिन्ह उपस्थित होत आहे.
सध्या जिल्ह्यात सर्वत्र मुसळधार पाऊस सुरू असून अनेक ठिकाणी पूरस्थिती निर्माण झाली आहे. अशा परिस्थितीत पायाभूत सुविधा सक्षम असणे अपेक्षित असताना, जमिनीखाली सुरक्षित असलेली पाइपलाइनच उघडी पडून हवेत लटकत असल्याचे दृश्य नागरिकांसाठी धक्कादायक ठरत आहे. पाइपलाइनभोवतालची माती पूर्णपणे वाहून गेली असून अनेक ठिकाणी जमीन खचली आहे. त्यामुळे शेतीचे नुकसान होण्याबरोबरच भविष्यात आणखी मोठा अपघात होण्याची भीतीही व्यक्त केली जात आहे.
ऐन पावसाळ्यातच हा प्रकार घडल्याने कामाच्या गुणवत्तेचा प्रश्न अधिक गंभीर बनला आहे. जर एका पावसाळ्यातच पाइपलाइनची अशी अवस्था होत असेल, तर संबंधित काम कोणत्या दर्जाचे करण्यात आले होते? काम पूर्ण झाल्यानंतर तांत्रिक तपासणी झाली होती का? अधिकाऱ्यांनी प्रत्यक्ष पाहणी केली होती का? अशा अनेक प्रश्नांची उत्तरे आता प्रशासनाने जनतेसमोर देण्याची गरज निर्माण झाली आहे.
शेतकरी आणि नागरिकांनी कृष्णा खोरे विकास महामंडळाने तातडीने घटनास्थळी पाहणी करून दोषी कंत्राटदार व संबंधित अधिकाऱ्यांवर कठोर कारवाई करावी, तसेच नुकसानग्रस्त शेतकऱ्यांना तात्काळ भरपाई द्यावी, अशी जोरदार मागणी केली आहे. सार्वजनिक पैशातून उभारल्या जाणाऱ्या विकासकामांचा दर्जा जर पहिल्याच मोठ्या पावसात उघडा पडत असेल, तर ही केवळ एका पाइपलाइनची घटना नसून संपूर्ण कामकाज पद्धतीवर प्रश्नचिन्ह उभे करणारी बाब आहे.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!