जावळी तालुक्यातील
सायघरमध्ये दरडीच्या
धोक्याची घंटा!
पहाटे राहत्या घरावर दरड कोसळली
११ कुटुंबांतील ४५ नागरिकांचे स्थलांतर
संतोष शिराळे | सातारा
सातारा जिल्ह्यात सुरू असलेल्या मुसळधार पावसाचा फटका आता डोंगराळ भागाला बसू लागला आहे. जावळी तालुक्यातील सायघर येथे आज पहाटे एका राहत्या घरावर दरड कोसळून मोठे नुकसान झाले. सुदैवाने या घटनेत कोणतीही जीवितहानी झाली नाही. मात्र, या घटनेने संपूर्ण परिसरात भीतीचे वातावरण निर्माण झाले आहे.
घटनेची माहिती मिळताच प्रशासनाने तातडीने घटनास्थळी धाव घेतली. जिल्हा परिषद सदस्य वसंतराव मानकुमरे, उपविभागीय अधिकारी श्री. आशिष बारकुल, तहसीलदार प्रवीण मुदगुल, गटविकास अधिकारी निलेश पाटील, पोलीस अधिकारी तसेच महसूल व ग्रामविकास विभागाच्या पथकाने घटनास्थळी पाहणी करून परिस्थितीचा आढावा घेतला.
दरडीचा धोका कायम असल्याने खबरदारीचा उपाय म्हणून गावातील ११ कुटुंबांतील ४५ नागरिकांचे तातडीने स्थलांतर करण्यात आले. यापैकी एका कुटुंबाची शाळेत तात्पुरती व्यवस्था करण्यात आली, तर उर्वरित दहा कुटुंबांना त्यांच्या नातेवाईकांकडे सुरक्षित हलविण्यात आले आहे. प्रशासनाने नागरिकांना अफवांवर विश्वास न ठेवता सतर्क राहण्याचे आवाहन केले आहे.
डोंगर उतार, दरडीचा धोका असलेली ठिकाणे, ओढे-नाले आणि पूरप्रवण भागांपासून दूर राहावे. घरांच्या परिसरात भेगा, माती घसरणे किंवा दरडीची कोणतीही चिन्हे दिसल्यास तात्काळ महसूल विभाग, ग्रामपंचायत किंवा पोलीस प्रशासनाला माहिती द्यावी, असे आवाहन आपत्ती व्यवस्थापनकडून करण्यात आले आहे.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!