दरड कोसळल्याने
जावळी–महाबळेश्वरला
जोडणारा मालदेव–मार्ली घाट बंद
वाहतुकीला ब्रेक, मलबा हटविण्यासाठी संबंधित यंत्रणेची तयारी सुरू
मेढा | प्रतिनिधी
सतत सुरू असलेल्या मुसळधार पावसाचा फटका जावळी तालुक्याला पुन्हा बसला असून मालदेव–मार्ली घाटात दरड कोसळल्याने हा महत्त्वाचा घाटमार्ग वाहतुकीसाठी बंद करण्यात आला आहे. मंगळवारी (५ ऑगस्ट) रात्री उशिरा घडलेल्या या घटनेमुळे परिसरातील नागरिकांसह प्रवाशांची मोठी गैरसोय झाली आहे.
दरड कोसळताना डोंगरावरील मोठे दगड, माती आणि खडकांचा ढिगारा थेट रस्त्यावर आल्याने मार्ग पूर्णपणे बंद झाला आहे. जावळी आणि महाबळेश्वर तालुक्यांना जोडणारा तसेच मेढा–मार्ली मार्गे भिलारकडे जाण्यासाठी वापरला जाणारा हा घाटमार्ग स्थानिकांसाठी अत्यंत महत्त्वाचा मानला जातो. त्यामुळे रस्ता बंद झाल्याने दैनंदिन वाहतुकीवर मोठा परिणाम झाला आहे.
घटना रात्री उशिरा घडल्यामुळे कोणतीही जीवितहानी किंवा वाहनांचे नुकसान झाले नसल्याचे प्राथमिक माहितीतून समोर आले आहे. मात्र, सुरक्षेच्या कारणास्तव प्रशासनाने या मार्गावरील वाहतूक तातडीने थांबविली असून नागरिकांना पर्यायी मार्गांचा वापर करण्याचा सल्ला दिला आहे.
मागील काही दिवसांपासून सुरू असलेल्या जोरदार पावसामुळे डोंगरातील माती व खडक कमकुवत झाल्याने दरड कोसळल्याचा अंदाज व्यक्त केला जात आहे. हवामानाची परिस्थिती लक्षात घेता घाट परिसरात आणखी दरडी कोसळण्याची शक्यता असल्याने खबरदारी घेण्याचे आवाहन प्रशासनाने केले आहे.
दरम्यान, स्थानिक नागरिकांनीही सार्वजनिक बांधकाम विभागाने तातडीने यंत्रसामग्री तैनात करून रस्ता पूर्ववत करावा, अशी मागणी केली आहे. शासकीय यंत्रणेने तत्परता दाखवली असून रस्त्यावर पडलेला मलबा हटविण्यासाठी संबंधित यंत्रणेकडून आवश्यक तयारी केली असून मार्ग शक्य तितक्या लवकर वाहतुकीसाठी खुला करण्याचे प्रयत्न सुरू आहे, असे प्रशासनाकडून सांगण्यात आले.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!