सातारा जिल्ह्यात मुसळधार
पावसाचा जोर कायम
कोयना धरणाने ओलांडली ७५ टक्के जिवंत पाणीसाठ्याची पातळी
धोम, तारळी धरणांतून विसर्ग सुरू
संतोष शिराळे | सातारा
सातारा जिल्ह्यात गेल्या २४ तासांपासून मुसळधार पावसाचा जोर कायम असून, विशेषतः पश्चिम भागात जोरदार पावसामुळे जनजीवनावर परिणाम झाला आहे. कोयना, नवजा आणि महाबळेश्वर परिसरात दमदार पाऊस झाल्याने जिल्ह्यातील प्रमुख धरणांतील पाणीसाठ्यात झपाट्याने वाढ होत आहे. कोयना धरणाने ७५ टक्क्यांहून अधिक जिवंत पाणीसाठ्याचा टप्पा पार केला आहे. वाढती आवक लक्षात घेता कोयना, धोम आणि तारळी धरणांतून टप्प्याटप्प्याने विसर्ग सुरू करण्याचा निर्णय सिंचन विभागाने घेतला आहे.
मंगळवारी (२८ जुलै) सायंकाळी ५ वाजेपर्यंत कोयना धरणाची पाणीपातळी २१४२ फूट ५ इंच (६५३.००९ मीटर) इतकी नोंदविण्यात आली. धरणात ८१.१२ टीएमसी (७७.०७ टक्के) एकूण, तर ७६.०० टीएमसी (७५.९० टक्के) जिवंत पाणीसाठा झाला आहे. धरणात ३२,१९१ क्युसेक वेगाने पाण्याची आवक सुरू असून, सायंकाळपर्यंत धरणातून कोणताही विसर्ग करण्यात आलेला नव्हता.
कोयना पाणलोट क्षेत्रात गेल्या २४ तासांत कोयना येथे ५९ मिमी, नवजा येथे ७६ मिमी पावसाची नोंद झाली आहे. महाबळेश्वरमध्ये यंदाच्या हंगामातील एकूण पर्जन्यमान ३,०३९ मिमीवर पोहोचले आहे.
धरणातील वाढती आवक लक्षात घेता बुधवार (२९ जुलै) सकाळी ९ वाजल्यापासून कोयना धरण पायथा विद्युतगृहाचे एक युनिट सुरू करून १,०५० क्युसेक पाण्याचा विसर्ग कोयना नदीपात्रात करण्यात येणार आहे. पावसाचा जोर कायम राहिल्यास आणि धरणातील आवक वाढल्यास सांडव्यावरील वक्राकार दरवाजे उघडून विसर्ग वाढविण्याची शक्यता असल्याचे सिंचन विभागाने स्पष्ट केले आहे.
दरम्यान, धोम धरणात ११.२० टीएमसी (८३ टक्के) पाणीसाठा झाल्याने मंगळवारी दुपारी १२.३० वाजल्यापासून सांडव्याद्वारे ५०० क्युसेक पाण्याचा विसर्ग कृष्णा नदीपात्रात सुरू करण्यात आला आहे. पाणलोट क्षेत्रातील पावसामुळे धरणात येणारी आवक वाढत असल्याने पाणीपातळी नियंत्रित ठेवण्यासाठी हा निर्णय घेण्यात आला आहे.
याशिवाय तारळी धरणातूनही मंगळवारी रात्री ९ वाजल्यापासून २,००० क्युसेक पाण्याचा विसर्ग तारळी नदीपात्रात सुरू करण्यात येणार आहे. पावसाच्या प्रमाणानुसार या विसर्गात आवश्यक ते बदल केले जाणार असल्याचे सिंचन विभागाने सांगितले आहे.
धरणांमधून सुरू होणाऱ्या विसर्गामुळे कोयना, कृष्णा आणि तारळी नदीच्या पाणीपातळीत वाढ होण्याची शक्यता असल्याने नदीकाठच्या गावांतील नागरिकांनी नदीपात्रात जाऊ नये, जनावरे, पंपसंच व इतर साहित्य सुरक्षित ठिकाणी हलवावे तसेच ग्रामपंचायती आणि संबंधित यंत्रणांनी सतर्क राहून प्रशासनाच्या सूचनांचे पालन करावे, असे आवाहन करण्यात आले आहे.
पावसाचे महत्त्वाचे आकडे
कोयना धरण जिवंत पाणीसाठा: ७६.०० टीएमसी (७५.९०%)
कोयना एकूण पाणीसाठा: ८१.१२ टीएमसी (७७.०७%)
कोयना धरणातील आवक: ३२,१९१ क्युसेक
कोयना धरण विसर्ग (२९ जुलै, सकाळी ९ वा.): १,०५० क्युसेक (केडीपीएच)
धोम धरण पाणीसाठा: ११.२० टीएमसी (८३%)
धोम धरण विसर्ग: ५०० क्युसेक
तारळी धरण विसर्ग: २,००० क्युसेक (रात्री ९ वाजल्यापासून)
२४ तासांचा पाऊस: कोयना – ५९ मिमी, नवजा – ७६ मिमी
महाबळेश्वर हंगामी पर्जन्यमान: ३,०३९ मिमी
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!