सांगली-सातारा विधान परिषद
निवडणुकीत तिरंगी लढत
मान-खटाव तालुक्यांकडे राज्याचे लक्ष
तानाजी पाटील यांच्यासह चार उमेदवारांनी घेतली माघार
धैर्यशील कदम, अभयसिंह जगताप आणि किशोर धुमाळ रिंगणात
सातारा : महाराष्ट्र विधान परिषद २०२६ च्या सांगली तथा सातारा स्थानिक प्राधिकारी मतदारसंघ निवडणुकीत उमेदवारी अर्ज माघारी घेण्याच्या प्रक्रियेनंतर निवडणुकीचे चित्र स्पष्ट झाले असून आता तिरंगी लढत रंगणार आहे. विशेष म्हणजे, अंतिम टप्प्यातील राजकीय घडामोडींनंतर या निवडणुकीची खरी रंगत सातारा जिल्ह्यातील मान आणि खटाव तालुक्यांत पाहायला मिळणार असल्याची चर्चा राजकीय वर्तुळात सुरू झाली आहे.
अर्ज माघारी घेण्याच्या अंतिम दिवशी तानाजी भगवान पाटील, प्रताप धोंडीराम पाटील, मयुर बाबासो पाटील आणि संजय नायकू मेंढे यांनी आपले उमेदवारी अर्ज मागे घेतले. त्यामुळे आता निवडणुकीच्या मैदानात तीन उमेदवार उरले आहेत.
भारतीय जनता पक्षाकडून धैर्यशील ज्ञानदेव कदम हे निवडणूक लढवत असून त्यांचा सामना राष्ट्रवादी काँग्रेस (शरदचंद्र पवार) पक्षाचे अभयसिंह खाशेराव जगताप यांच्याशी होणार आहे. तर किशोर हनमंत धुमाळ यांनी अपक्ष उमेदवार म्हणून रिंगणात उडी घेतल्याने निवडणुकीला तिरंगी स्वरूप प्राप्त झाले आहे.
सांगली सातारा विधान परिषद मतदारसंघातील एकूण मतदारसंख्या ८५३ इतकी आहे. स्थानिक स्वराज्य संस्थांच्या सदस्यांमधून ही निवडणूक होत असल्याने प्रत्येक मताला विशेष महत्त्व प्राप्त झाले आहे. उपलब्ध आकडेवारीनुसार दोन्ही जिल्ह्यांतील मिळून भाजपकडे ३१५ मतदारांचे संख्याबळ असून ते सर्वाधिक आहे. त्याखालोखाल उपमुख्यमंत्री अजित पवार यांच्या राष्ट्रवादी काँग्रेसकडे २०५ मतदार, राष्ट्रवादी काँग्रेस (शरदचंद्र पवार) पक्षाकडे ११९ मतदार, मुख्यमंत्री एकनाथ शिंदे यांच्या शिवसेनेकडे १११ मतदार, काँग्रेसकडे ७३ मतदार, अपक्ष ३० तर उद्धव ठाकरे यांच्या शिवसेनेकडे १ मतदार असल्याचे चित्र आहे.
या संख्याबळाच्या पार्श्वभूमीवर भाजपचे उमेदवार धैर्यशील कदम यांना महायुतीतील घटक पक्षांच्या मतांचा फायदा होण्याची शक्यता व्यक्त केली जात आहे. दुसरीकडे राष्ट्रवादी काँग्रेस (शरदचंद्र पवार) पक्षाचे अभयसिंह जगताप यांच्यासाठी महाविकास आघाडीतील मतांची एकजूट महत्त्वाची ठरणार आहे. अपक्ष उमेदवार किशोर धुमाळ यांची भूमिका देखील निकालावर परिणाम करणारी ठरू शकते.
विशेष म्हणजे, प्रमुख उमेदवार धैर्यशील कदम आणि अभयसिंह जगताप हे दोघेही सातारा जिल्ह्यातील मान-खटाव पट्ट्याशी संबंधित असल्याने या निवडणुकीला स्थानिक राजकारणाचीही किनार लाभली आहे. त्यामुळे राज्यभरातील राजकीय नेत्यांचे लक्ष आता मान आणि खटाव तालुक्यांतील राजकीय घडामोडींवर केंद्रित झाले आहे.
उमेदवारी अर्ज माघारीनंतर निवडणुकीचे चित्र स्पष्ट झाले असले तरी मतांची जुळवाजुळव, पक्षांतर्गत समन्वय आणि स्थानिक स्वराज्य संस्थांतील राजकीय समीकरणे यामुळे ही निवडणूक अखेरच्या क्षणापर्यंत चुरशीची होण्याची शक्यता वर्तवली जात आहे. त्यामुळे सांगली-सातारा विधान परिषद निवडणुकीचा निकाल राज्याच्या राजकारणात महत्त्वपूर्ण संदेश देणारा ठरणार आहे.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!