“कासचा निसर्ग
पुढील पिढ्यांसाठी जपा”
खासदार उदयनराजे भोसले यांचे पर्यटकांना आवाहन
फुले न तोडता, कचरा न करता नियमांचे पालन करा
कास फुलोत्सवाचा उदयनराजे यांच्या हस्ते शुभारंभ
सातारा | प्रतिनिधी
“कासचा निसर्ग आपण केवळ उपभोगण्यासाठी नव्हे, तर पुढील पिढ्यांसाठी जपण्यासाठी मिळालेला अनमोल वारसा आहे. त्यामुळे पर्यटकांनी पठारावरील फुले न तोडता, कचरा किंवा प्लास्टिक न टाकता आणि वन विभागाच्या नियमांचे काटेकोरपणे पालन करूनच निसर्गाचा आनंद घ्यावा,” असे कळकळीचे आवाहन खासदार श्रीमंत छत्रपती उदयनराजे भोसले यांनी केले. त्यांच्या हस्ते जागतिक नैसर्गिक वारसा स्थळ असलेल्या कास पठारावरील यंदाच्या फुलोत्सव महोत्सवाचा उत्साहात शुभारंभ झाला. यावेळी त्यांनी कासच्या पर्यटन विकासासोबतच नाजूक जैवविविधतेचे संवर्धन आणि शाश्वत पर्यटनाचा समतोल साधण्याची गरज असल्याचे सांगितले.
वन विभाग, सातारा वन परिक्षेत्र सातारा–मेढा आणि कास पठार कार्यकारी समितीच्या वतीने फुलोत्सवाच्या उद्घाटन सोहळ्याचे आयोजन करण्यात आले होते. फुलांच्या रंगांची मुक्त उधळण, हिरवाईने नटलेले डोंगर आणि धुक्याच्या दुलईने सजलेल्या कास पठारावर फुलोत्सवाच्या निमित्ताने पर्यटकांचीही मोठी वर्दळ पाहायला मिळाली.
पत्रकारांशी संवाद साधताना उदयनराजे भोसले यांनी कास पठाराशी असलेला आपला जिव्हाळा व्यक्त केला. “हा परिसर माझ्या अत्यंत आवडीचा आहे. येथे आल्यानंतर घाटाई देवीचे दर्शन होते आणि या परिसरातील स्थानिक लोकांशी असलेला जुना ऋणानुबंध अधिक घट्ट होतो,” असे ते म्हणाले. कास पठार हे केवळ पर्यटनस्थळ नसून साताऱ्याच्या नैसर्गिक आणि जैवविविधतेच्या वारशाचा महत्त्वाचा भाग असल्याचे त्यांनी सांगितले. कासच्या फुलांचा अनोखा बहर पाहण्यासाठी देश-विदेशातून पर्यटक येतात. त्यामुळे स्थानिक नागरिकांना रोजगार मिळतो, व्यवसायांना चालना मिळते आणि परिसराच्या अर्थव्यवस्थेलाही हातभार लागतो, असे त्यांनी नमूद केले.
कास पठारावरील फुलोत्सवामुळे स्थानिक नागरिकांसह डोंगराळ भागातील तरुणांना रोजगाराच्या विविध संधी उपलब्ध होत असल्याकडे उदयनराजे यांनी लक्ष वेधले. पूर्वी रोजगारासाठी मोठ्या शहरांकडे स्थलांतर करणाऱ्या तरुणांना आता पर्यटनाशी संबंधित व्यवसायातून स्थानिक पातळीवर उपजीविकेची साधने उपलब्ध होत आहेत. त्यामुळे स्थानिकांचे जीवनमान सुधारण्यास मदत होत असल्याचे त्यांनी सांगितले. कास धरणाच्या सौंदर्यीकरणामुळेही परिसरातील पर्यटनाला अधिक चालना मिळत असून, काससह परिसरातील पर्यटनाचा नियोजनबद्ध विकास होणे आवश्यक असल्याचे त्यांनी स्पष्ट केले.
कास पठारावरील दुर्मीळ रानफुलांचा बहर हा पर्यटकांसाठी मोठे आकर्षण असला, तरी वाढत्या पर्यटनामुळे येथील नाजूक जैवविविधतेवर परिणाम होणार नाही, याची काळजी घेणे गरजेचे आहे. निसर्गाचा आनंद घेताना त्याचे नुकसान होणार नाही, याची जबाबदारी पर्यटक, स्थानिक नागरिक आणि प्रशासन या सर्वांची असल्याचे उदयनराजे यांनी सांगितले. कास पठारावर स्वच्छता राखण्याबरोबरच प्लास्टिकचा वापर आणि कचरा टाकण्यास प्रतिबंध करण्यासाठी पर्यटकांनी प्रशासनाला सहकार्य करावे, असेही त्यांनी आवाहन केले.
कासचा नैसर्गिक वारसा, स्थानिक नागरिकांचे हित आणि पर्यटनातून निर्माण होणाऱ्या रोजगाराच्या संधी यांच्यात योग्य समतोल साधणे आवश्यक आहे. पर्यावरणाची हानी न करता पर्यटनाला चालना देण्यासाठी शाश्वत आणि पर्यावरणपूरक पर्यटनाचा मार्ग स्वीकारला पाहिजे, अशी अपेक्षा उदयनराजे भोसले यांनी व्यक्त केली.
यावेळी भाजपा सातारा लोकसभा संयोजक सुनील काटकर, सातारा नगरपरिषदेचे उपनगराध्यक्ष दत्तात्रय बनकर, रक्षक प्रतिष्ठानचे संस्थापक अध्यक्ष सुशील मोझर, उपवनसंरक्षक अमोल सातपुते, वनपरिक्षेत्र अधिकारी संदीप झोपाळे, मेढा पोलीस ठाण्याचे सहाय्यक पोलीस निरीक्षक सुधीर पाटील यांच्यासह वन विभागाचे अधिकारी-कर्मचारी, स्थानिक नागरिक व पर्यटक उपस्थित होते.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!