वरिष्ठांचा जाच, राजकीय दबावाच्या आरोपांनी खळबळ
फलटणचे वैद्यकीय अधिकारी
डॉ. राजेंद्र रुपनवर यांचे
उपचारादरम्यान निधन
सायन येथे हायव्होल्टेज टॉवरवर चढून आत्महत्येचा प्रयत्न
मृत्यूपूर्वी वरिष्ठ अधिकाऱ्यांवर केलेले गंभीर आरोप
वैद्यकीय अधीक्षक डॉ. लीला मदने निलंबित
दोषींवर कारवाईची नातेवाईकांची मागणी
फलटण | प्रतिनिधी
वरिष्ठांचा मानसिक त्रास, पगार रोखणे आणि राजकीय दबावाला कंटाळून मुंबईतील सायन परिसरात हायव्होल्टेज टॉवरवर चढून आत्महत्येचा प्रयत्न केलेले फलटण उपजिल्हा रुग्णालयातील वैद्यकीय अधिकारी डॉ. राजेंद्र रुपनवर यांचे रविवारी (३१ ऑगस्ट) उपचारादरम्यान दुर्दैवी निधन झाले. त्यांच्या निधनाच्या वृत्ताने फलटणसह सातारा जिल्ह्यात खळबळ उडाली असून, या प्रकरणातील दोषींवर तातडीने कारवाई करण्याची मागणी जोर धरू लागली आहे.
डॉ. रुपनवर यांनी आत्महत्येचा प्रयत्न करण्यापूर्वी वरिष्ठांकडून होत असलेला मानसिक त्रास, पगार रोखणे तसेच राजकीय दबावाबाबत गंभीर आरोप केले होते. या प्रकरणात चौकशी समितीच्या अहवालानंतर फलटण उपजिल्हा रुग्णालयाच्या वैद्यकीय अधीक्षक डॉ. लीला मदने यांना ३० ऑगस्ट रोजी निलंबित करण्यात आले होते. त्यानंतर दुसऱ्याच दिवशी डॉ. रुपनवर यांचे निधन झाल्याने प्रकरणाला अधिक गंभीर वळण मिळाले आहे.
मिळालेल्या माहितीनुसार, शस्त्र परवान्यासाठी आवश्यक असलेल्या फिटनेस प्रमाणपत्रावरून डॉ. रुपनवर यांच्यावर एका राजकीय पक्षाशी संबंधित व्यक्तींकडून दबाव आणण्यात आला होता. प्रमाणपत्राबाबत संशय निर्माण झाल्याने डॉ. रुपनवर यांनी ते देण्यास नकार दिला. याच कारणावरून त्यांना शिवीगाळ तसेच धक्काबुक्की करण्यात आल्याचा आरोप आहे. या प्रकारानंतर डॉ. रुपनवर यांनी संबंधित प्रकाराची वरिष्ठांकडे तक्रार केल्याचे सांगितले जाते. मात्र, तक्रार केल्यानंतर संबंधितांवर कारवाई होण्याऐवजी आपलाच पगार रोखण्यात आल्याचा आरोप डॉ. रुपनवर यांनी केला होता. त्यामुळे ते मोठ्या मानसिक तणावाखाली असल्याचे त्यांच्या जवळच्या व्यक्तींचे म्हणणे आहे.
डॉ. रुपनवर यांनी आपल्यावर होत असलेल्या कथित अन्यायाबाबत सोशल मीडियावर व्हिडिओ प्रसारित केल्याची माहिती समोर आली आहे. तसेच त्यांनी डायरीत आणि तळहातावर जबाबदार व्यक्तींची नावे लिहून ठेवल्याचेही सांगितले जात आहे. या माध्यमातून त्यांनी वरिष्ठ अधिकारी आणि संबंधित व्यक्तींविरोधात आपली भूमिका मांडली होती. त्यामुळे त्यांच्या आत्महत्येच्या प्रयत्नानंतर या प्रकरणाकडे प्रशासनाचेही लक्ष वेधले गेले.
डॉ. रुपनवर यांनी वैद्यकीय अधीक्षक डॉ. लीला मदने आणि आरोग्य उपसंचालक डॉ. भगवान पवार यांच्यावर पिळवणूक व मानसिक त्रासाचे आरोप केले होते. या आरोपांच्या पार्श्वभूमीवर जिल्हा शल्यचिकित्सकांनी चौकशी समिती नियुक्त केली होती. या समितीच्या अहवालात डॉ. लीला मदने दोषी आढळल्याचे प्रशासनाकडून सांगण्यात आले. त्यानंतर आरोग्य सेवा आयुक्त संजय काटकर यांनी ३० ऑगस्ट रोजी डॉ. मदने यांना निलंबित केले. निलंबन काळात त्यांचे मुख्यालय जिल्हा रुग्णालय, सोलापूर येथे निश्चित करण्यात आले आहे. दरम्यान, डॉ. भगवान पवार यांच्याबाबत करण्यात आलेल्या आरोपांवर पुढील कोणती प्रशासकीय कारवाई होते, याकडेही लक्ष लागले आहे.
डॉ. रुपनवर यांनी २७ ऑगस्ट रोजी मुंबईतील सायन परिसरात हायव्होल्टेज टॉवरवर चढून आत्महत्येचा प्रयत्न केला होता. त्यानंतर त्यांना खाली उतरवून उपचारासाठी रुग्णालयात दाखल करण्यात आले. गंभीर अवस्थेत त्यांच्यावर उपचार सुरू होते. मात्र, उपचारादरम्यान ३१ ऑगस्ट रोजी त्यांची प्राणज्योत मालवली. त्यांच्या निधनामुळे वैद्यकीय क्षेत्रासह फलटण आणि माळशिरस तालुक्यात हळहळ व्यक्त होत आहे.
डॉ. रुपनवर यांच्या निधनाची बातमी समोर येताच फलटण तसेच त्यांच्या माळशिरस तालुक्यातील मूळ गावात संतापाची लाट पसरली आहे. या प्रकरणातील दोषींवर तातडीने कारवाई करून अटक करण्यात यावी, अशी मागणी नातेवाईकांकडून करण्यात येत आहे. दोषींना तत्काळ अटक न झाल्यास डॉ. रुपनवर यांच्या पार्थिवावर फलटण उपजिल्हा रुग्णालयासमोरच अंत्यसंस्कार करू, असा इशाराही नातेवाईकांनी दिल्याचे समोर आले आहे. त्यामुळे फलटणमध्ये तणावाचे वातावरण निर्माण झाले असून, प्रशासन आणि पोलीस यंत्रणेसमोर परिस्थिती हाताळण्याचे आव्हान निर्माण झाले आहे.
दरम्यान, गेल्या वर्षभरात सातारा जिल्ह्याच्या आरोग्य यंत्रणेत चार वर्ग-१ अधिकाऱ्यांसह एकूण आठ जणांवर निलंबनाची कारवाई झाल्याची माहिती आहे. या पार्श्वभूमीवर आरोग्य विभागातील प्रशासकीय कामकाज, अधिकारी-कर्मचाऱ्यांमधील संबंध, तक्रारींचे निराकरण आणि राजकीय हस्तक्षेपाच्या आरोपांबाबत प्रश्न उपस्थित होत आहेत.
डॉ. रुपनवर यांच्या मृत्यूनंतर या संपूर्ण प्रकरणाची सखोल आणि निष्पक्ष चौकशी करण्याची मागणी होत आहे. त्यांच्या मृत्यूस नेमकी कोणती परिस्थिती कारणीभूत ठरली, कथित दबाव आणि मानसिक त्रासाची व्याप्ती किती होती, तसेच त्यांनी केलेल्या आरोपांमध्ये तथ्य किती आहे, याचा तपास होणे आता महत्त्वाचे ठरणार आहे. दरम्यान, या प्रकरणातील सर्व आरोपांची स्वतंत्र तपास यंत्रणेमार्फत सखोल चौकशी करून दोषींवर कठोर कारवाई करावी, अशी मागणी नातेवाईक व संबंधितांकडून होत आहे.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!