पालकमंत्रीपदाचा निर्णय
मुख्यमंत्र्यांचाच; सध्या बदलाचा
प्रश्नच नाही : शिवेंद्रसिंहराजे
जयकुमार गोरे यांच्या विधानावर शिवेंद्रसिंहराजे यांची प्रतिक्रिया
जिल्हा बँकेची निवडणूक ऑक्टोबरपर्यंत जाण्याची शक्यता
सातारा : प्रतिनिधी
भाजपचे आमदार तथा ग्रामविकास व पंचायत राज मंत्री जयकुमार गोरे यांनी सार्वजनिक कार्यक्रमात “शिवेंद्रसिंहराजे भोसले हे साताऱ्याचे पालकमंत्री व्हावेत, असे मला मनापासून वाटते,” असे विधान केल्यानंतर सातारा जिल्ह्याच्या राजकीय वर्तुळात चर्चेला उधाण आले. या विधानामुळे पालकमंत्रीपदाच्या संभाव्य बदलाबाबत तर्क-वितर्क सुरू झाले असतानाच, सातारा जावळीचे आमदार तथा सार्वजनिक बांधकाममंत्री शिवेंद्रसिंहराजे भोसले यांनी आपली भूमिका स्पष्ट केली आहे.
“सातारा पालकमंत्रीपदाचा निर्णय हा स्थानिक पातळीवरचा विषय नाही. राज्यातील पालकमंत्र्यांची नियुक्ती करण्याचा अधिकार मुख्यमंत्र्यांचा आहे. सध्या सातारा जिल्ह्याला पालकमंत्री नेमलेले आहेत. त्यामुळे त्यात बदल होण्याचा किंवा त्याबाबत चर्चा करण्याचा प्रश्नच नाही,” असे स्पष्ट शब्दांत शिवेंद्रसिंहराजे यांनी सांगितले.
जयकुमार गोरे यांच्या विधानाबाबत प्रतिक्रिया देताना शिवेंद्रसिंहराजे यांनी त्यांच्याशी असलेल्या संबंधांचा उल्लेख केला. “आम्ही दोघेही एकाच पक्षात आहोत. आम्ही आमदार आहोत आणि एकत्र काम करतो. सार्वजनिक कार्यक्रमात त्यांनी स्नेहापोटी आणि आपुलकीने ते विधान केले असावे,” असे त्यांनी सांगितले.
दोन्ही नेत्यांमध्ये राजकीय आणि वैयक्तिक सलोखा असल्याचे सांगत त्यांनी गोरे यांच्या वक्तव्याकडे कोणत्याही राजकीय मागणीच्या स्वरूपात पाहण्याची गरज नसल्याचे सांगितले. त्यामुळे गोरे यांच्या वक्तव्यावरून जिल्ह्यात सुरू झालेल्या चर्चेला शिवेंद्रसिंहराजे यांनी संयमित भूमिका घेत पूर्णविराम देण्याचा प्रयत्न केला आहे.
सातारा जिल्ह्याच्या पालकमंत्रीपदावरून यापूर्वीही राजकीय चर्चांना उधाण आले आहे. त्यातच जयकुमार गोरे यांनी शिवेंद्रसिंहराजे यांचे नाव पुढे केल्याने नव्या राजकीय समीकरणांची चर्चा सुरू झाली. मात्र, “सध्या जिल्ह्याला पालकमंत्री नेमलेले आहेत,” असे सांगत शिवेंद्रसिंहराजे यांनी पालकमंत्री बदलाच्या चर्चेला फारसे महत्त्व नसल्याचे स्पष्ट केले. पालकमंत्री कोण असावा, याचा निर्णय स्थानिक नेत्यांच्या इच्छेवर किंवा मागणीवर होत नसून मुख्यमंत्रीच त्याबाबत अंतिम निर्णय घेतात, हा मुद्दाही त्यांनी अधोरेखित केला.
दरम्यान, सातारा जिल्हा मध्यवर्ती सहकारी बँकेच्या आगामी निवडणुकीबाबतही शिवेंद्रसिंहराजे यांनी भाष्य केले. सध्या निवडणूक प्रक्रिया प्राथमिक टप्प्यात असून मतदार याद्या, हरकती आणि प्रशासकीय बाबींची पूर्तता सुरू आहे. त्यामुळे निवडणुकीच्या तारखेबाबत आताच अंदाज बांधणे घाईचे ठरेल, असे त्यांनी स्पष्ट केले.
“जिल्हा बँकेची निवडणूक ऑक्टोबर महिन्यापर्यंत जाण्याची शक्यता आहे. सध्या कच्ची व पक्की मतदार यादी, त्यावरील हरकती आणि इतर प्रशासकीय प्रक्रिया सुरू आहेत. ही संपूर्ण प्रक्रिया पूर्ण झाल्यानंतरच पुढील निर्णय घेतले जातील,” असे शिवेंद्रसिंहराजे यांनी सांगितले.
जिल्हा बँकेच्या निवडणुकीच्या पार्श्वभूमीवर सध्या जिल्ह्यातील राजकीय हालचालींना वेग आला आहे. विविध गटांकडून मोर्चेबांधणी सुरू असून सोसायट्यांचे ठराव, मतदार याद्या आणि संभाव्य उमेदवारांच्या नावांवर चर्चा रंगत आहे. मात्र, अधिकृत निवडणूक कार्यक्रम जाहीर होण्यापूर्वीच संभाव्य समीकरणांवर चर्चा करणे योग्य नसल्याचे शिवेंद्रसिंहराजे यांच्या भूमिकेतून स्पष्ट झाले.
एकीकडे जयकुमार गोरे यांच्या “शिवेंद्रसिंहराजे साताऱ्याचे पालकमंत्री व्हावेत” या वक्तव्यामुळे राजकीय चर्चांना उधाण आले असताना, दुसरीकडे शिवेंद्रसिंहराजे यांनी मात्र या विषयाला राजकीय रंग न देता पालकमंत्री नियुक्तीचा अंतिम अधिकार मुख्यमंत्र्यांचा असल्याचे स्पष्ट केले आहे. त्यामुळे गोरे यांच्या विधानामागे नेमका राजकीय संदेश आहे की केवळ स्नेहभावना, याबाबत सुरू असलेल्या चर्चांना शिवेंद्रसिंहराजे यांच्या प्रतिक्रियेमुळे वेगळी दिशा मिळाली आहे.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!