सातारा हाफ हिल मॅरेथॉनचे संस्थापक संदीप काटे व त्यांच्या प्रायोजकावर गुन्हा दाखल करावा : महेश शिवदास

कास पठारावर रात्रीच्या वेळी

एस टु सी प्रॅक्टिस मॅरेथॉन स्पर्धेचे

विनापरवाना आयोजन 

सातारा हाफ हिल मॅरेथॉनचे संदीप काटे व त्यांच्या प्रायोजकांवर गुन्हा दाखल करावा

सामाजिक कार्यकर्ते, पर्यावरणप्रेमी महेश शिवदास यांची मागणी

सातारा : पोलीस प्रशासन व वन विभागाची कोणतीही कायदेशीर परवानगी न घेता दि. सहा एप्रिल २०२५ रोजी रात्री १२ ते पहाटेपर्यंत एस टु सी प्रॅक्टिस मॅरेथॉन स्पर्धा कास पठारावर आयोजित केली होती. ज्या वेळेत ही स्पर्धा आयोजित केली होती, ती वेळ ही वन्यप्राण्यांची रात्रीच्या वेळी पाणी पिणे, भटकंती व शिकार करण्याची असताना बेजबाबदार डॉक्टरांनी यात विघ्न आणून वन्यप्राण्यांच्या जीवितास धोका निर्माण केल्याचा आरोप करत सातारा हाफ हिल मॅरेथॉनचे संस्थापक संदीप काटे व त्यांच्या प्रायोजकावर गुन्हा दाखल करावा, अशी मागणी सामाजिक कार्यकर्ते, पर्यावरणप्रेमी महेश अशोक शिवदास यांनी पत्रकार परिषदेत केली.

याबाबत शिवदास म्हणाले, कास पठार, सातारा हाफ हिल मॅरेथॉनचे संस्थापक संदीप काटे, स्पर्धेचे प्रायोजक व इतर सहकाऱ्यांनी पोलीस प्रशासन व वन विभागाची कोणतीही कायदेशीर परवानगी न घेता दि. सहा एप्रिल २०२५ रोजी रात्री १२ वाजता १२ ते पहाटेपर्यंत एस टु सी प्रॅक्टिस मॅरेथॉन ही स्पर्धा आयोजित केली होती. ही स्पर्धा ज्या वेळेत आयोजित केली गेली ती वेळ ही वन्य प्राण्यांची रात्रीच्या वेळी पाणी पिणे, भटकंती करण्यासाठी असताना त्यांच्या या कार्यात जबाबदार डॉक्टरांनी विघ्न आणून त्यांच्या जीवितास धोका निर्माण केला. तसेच दि. १३ एप्रिल २०२५ रोजी कास अल्ट्रा या नावाने शिव यादव यांनीही वरीलप्रमाणेच कृत्य करून भल्या मोठ्या लाईटचे फोकस लावून रस्ता अडवून ही स्पर्धा विनापरवानगी घेतली होती. याबाबतची तक्रार त्याच रात्री सातारा पोलीस अधिक्षक, पोलीस निरीक्षक, तालुका पोलीस स्टेशन व सातारा कंट्रोल पोलीस ऑफिस, वनविभाग अधिकारी रौंदळ, चव्हाण यांच्याकडे केली होती. या तक्रारीनुसार दि. सहा एप्रिल २०२५ रोजी सातारा तालुका पोलीस ठाण्यात आयोजक संदीप काटे व इतरांवर, तसेच दि. १५ एप्रिल २०२५ रोजी कास अल्ट्राचे आयोजक शिव यादव यांच्यावरही गुन्हा दाखल केला आहे, असे शिवदास यांनी सांगितले.

याबाबत सामाजिक कार्यकर्ता व पर्यावरणप्रेमी महेश शिवदास यांनी अधिपत्याखाली येणाऱ्या वनविभागाच्या अधिकाऱ्यांकडे तक्रार केली होती. मात्र, अधिकाऱ्यांनी झोपेचे सोंग घेत कोणताही कर्मचारी संबंधित ठिकाणी पाठवला नाही. त्यामुळे वनविभागाच्या आरती भारद्वाज, रौंदळ व चव्हाण त्याचप्रमाणे वरील दोन्ही स्पर्धा घेणारे आयोजक, भागीदार, संचालक मंडळ, स्पर्धक व हॉलिनटीअर (स्वयंसेवक) यांच्यावर गुन्हा दाखल करण्यात यावेत. तसेच यापुढे वन्यप्राण्यांच्या अधिवासात कोणतीही स्पर्धा आयोजित करण्यास परवानगी देऊ नये. या स्पर्धा आयोजकांवर तात्काळ गुन्हे दाखल करून योग्य ती कारवाई करण्यात यावी, अन्यथा ८ दिवसात जिल्हा पोलीस अधिक्षक कार्यालयाबाहेर हजारो वन्यप्रेमी, पर्यावरणप्रेमींच्या साथीने आमरण उपोषणास बसणार आहे. याची याची संपूर्ण जबाबदारी पोलीस प्रशासनाची राहील, असा इशारा आहे महेश शिवदास यांनी प्रशासनाला दिला आहे.