महाबळेश्वर महापर्यटन
उत्सवासाठी सर्व विभागांनी
समन्वयातून तयारी करावी
जिल्हाधिकारी संतोष पाटील; दि. 2 ते 4 मेदरम्यान आयोजन
सातारा : महाबळेश्वर येथे महापर्यटन उत्सव 2025 चे दि. 2 ते 4 मे या कालावधीत आयोजन करण्यात आले आहे. या उत्सवाला राज्यभरातून पर्यटक येणार असून कोणत्याही पर्यटकाची गैरसोय होणार नाही याची दक्षता घेऊन उत्सव यशस्वी होण्यासाठी सर्व विभागांनी समन्वयातून काम करावे, असे निर्देश जिल्हाधिकारी संतोष पाटील यांनी दिले.
महाबळेश्वर येथील वन विभागाच्या हिरडा विश्रामगृहात आयोजित बैठकीत जिल्हाधिकारी श्री. पाटील बोलत होते. या बैठकीला मुख्य कार्यकारी अधिकारी याशनी नागराजन, पोलीस अधीक्षक समीर शेख, वाईचे प्रांताधिकारी राजेंद्र कचरे, तहसीलदार तेजस्विनी पाटील, अजित पाटील सोनाली मेटकरी यांच्यासह विविध विभागांचे अधिकारी उपस्थित होते.
उत्सव कालावधीत पर्यटकांची गर्दी होऊन वाहतुकीला अडथळा होणार नाही, याची दक्षता पोलीस विभागांनी घ्यावी, असे निर्देश देऊन जिल्हाधिकारी श्री. पाटील म्हणाले, महाबळेश्वरला येण्यासाठी वाई, सातारा कोकणातून रस्ते आहेत. या रस्त्यांवरील कामे व महाबळेश्वर अंतर्गत रस्त्यांची कामे उत्सवापूर्वी पूर्ण करावीत. त्याचबरोबर महाबळेश्वर शहर सुशोभीकरण करावे. या उत्सवाला जास्तीत जास्त पर्यटक येण्यासाठी विविध माध्यमांचा उपयोग करून प्रसिद्धी द्यावी. या उत्सवामध्ये स्थानिक व्यावसायिकांचाही सहभाग घ्यावा, असे निर्देशही जिल्हाधिकारी यांनी दिले.
ज्या ठिकाणी पार्किंगची व्यवस्था करण्यात येणार आहे, त्या ठिकाणाहून पोहोचण्यासाठी बस उपलब्ध करून देण्यात यावी. या बसमधून पर्यटकांना कार्यक्रमाच्या ठिकाणी पोहोच करावे. आपत्ती व्यवस्थापनासाठी अधिकारी कर्मचाऱ्यांची नियुक्ती करावी. येणाऱ्या पर्यटकांच्या आरोग्यदृष्टीने आराखडा तयार करावा. महापर्यटन उत्सव महाबळेश्वर काम ज्या संस्थेला दिले आहे त्या संस्थेशी समन्वय साधून विविध विभागांनी उत्सवासंदर्भातील कामे पूर्ण करावी. संस्थेने विविध प्रकारच्या ऐतिहासिक थीमचा वापर करून कार्यक्रमाच्या ठिकाणचे प्रवेशद्वार तयार करावे. सांस्कृतिक कार्यक्रममध्ये स्थानिकांचा सहभाग घ्यावा. पर्यटकांच्या सुरक्षेच्या दृष्टीने पर्यटन पॉईंटचे पोलीस व सार्वजनिक बांधकाम विभागाने सर्वेक्षण करावे. त्याचबरोबर कृषी विभागाने उत्सव काळात तृणधान्य महोत्सवाचे आयोजन ही करावे अशा सूचनाही जिल्हाधिकारी श्री. पाटील यांनी बैठकीत दिल्या.
मुख्य कार्यकारी अधिकारी याशनी नागराजन म्हणाल्या, उत्सव कालावधीमध्ये बचत गटांनी उत्पादित केलेल्या मालाची विक्री होण्यासाठी स्टॉल उपलब्ध करून द्यावे. संस्थेने एकाच कार्यक्रमावर लक्ष केंद्रित न करता विविध कार्यक्रम दर्जेदार होतील याकडे लक्ष द्यावे.
पोलीस अधीक्षक समीर शेख म्हणाले, उत्सव कालावधीत गर्दी होणार नाही व वाहतुकीला कोणताही अडथळा होणार नाही याची दक्षता पोलीस विभागाकडून घेतली जाईल. घाटातील ज्या ठिकाणी कठडे तुटलेले आहेत, त्या ठिकाणी सार्वजनिक बांधकाम विभागाने कठडे दुरुस्त करावेत. वाहन बंद पडल्यास ते हलवण्यासाठी क्रेनची व्यवस्था ही केली जाईल. तसेच उत्सव काळात ज्या ज्या ठिकाणी कार्यक्रम आहेत याची माहिती असणारे माहितीपत्र छापावेत व त्यावर क्यूआर कोडचा वापर करावा अशा सूचना उत्सवाचे काम करणाऱ्या संस्थेला केल्या.
.jpeg)
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!