नाशिक सिंहस्थ कुंभमेळ्याच्या
धर्मध्वजारोहणापूर्वी छत्रपती
शिवाजी महाराजांच्या पवित्र
चरणपादुकांचे पाद्यपूजन करावे
त्र्यंबकेश्वर देवस्थानच्या माजी विश्वस्त व माजी नगराध्यक्षा सौ. ललिता शिंदे यांची राज्य सरकारकडे मागणी
त्र्यंबकेश्वरच्या सिंहस्थ परंपरेशी छत्रपतींच्या धर्मरक्षणाच्या इतिहासाची सांगड
३१ ऑक्टोबरच्या धर्मध्वजारोहणाच्या शासकीय प्रोटोकॉलमध्ये पाद्यपूजनाचा समावेश व्हावा
संतोष शिराळे | सातारा
आगामी नाशिक-त्र्यंबकेश्वर सिंहस्थ कुंभमेळ्याच्या पार्श्वभूमीवर त्र्यंबकेश्वर देवस्थानच्या माजी विश्वस्त व माजी नगराध्यक्ष सौ. ललिता संदीप शिंदे (देशमुख) यांनी छत्रपती शिवाजी महाराजांच्या पवित्र चरणपादुकांचे पाद्यपूजन करूनच धर्मध्वजारोहण कार्यक्रमाची सुरुवात करावी, अशी महत्त्वपूर्ण मागणी केली आहे. या मागणीची राज्य सरकारने गांभीर्याने दखल घेऊन धर्मध्वजारोहणाच्या शासकीय प्रोटोकॉलमध्ये पाद्यपूजनाचा समावेश करावा, अशी मागणी त्यांनी सातारा येथे आयोजित पत्रकार परिषदेत केली. नाशिक-त्र्यंबकेश्वर सिंहस्थ कुंभमेळ्याच्या धर्मध्वजारोहण कार्यक्रमाच्या निमित्ताने साधू-संत व महंतांच्या मंत्रोच्चारात छत्रपती शिवाजी महाराजांच्या पवित्र चरणपादुकांचे पूजन करण्यात यावे. तसेच गोदावरी तीर्थाच्या माध्यमातून पंचामृतरूपाने हे पूजन करण्याची परंपरा सुरू करावी, अशी भावना शिंदे यांनी व्यक्त केली.
छत्रपती शिवाजी महाराजांच्या गादीचे वारसदार खासदार उदयनराजे भोसले यांची भेट घेण्यासाठी तसेच साताऱ्यातील छत्रपती घराण्याच्या गादीचे दर्शन घेण्यासाठी आपण साताऱ्यात आल्याचे शिंदे यांनी सांगितले. छत्रपतींच्या धर्मरक्षणाच्या कार्याचे स्मरण आणि त्यांच्या ऋणातून मुक्त होण्याच्या भावनेतून ही मागणी पुढे आणल्याचे त्यांनी स्पष्ट केले. त्र्यंबकेश्वरच्या कुंभपरंपरेशी छत्रपतींचा संबंध
भारतामधील हरिद्वार, प्रयागराज, उज्जैन आणि त्र्यंबकेश्वर हे चार प्रमुख कुंभक्षेत्र मानले जातात. त्र्यंबकेश्वर येथील कुंभमेळ्याच्या परंपरेला आक्रमणांच्या काळात अडथळे निर्माण झाले होते. या काळात साधू-संतांना अभय देऊन कुंभपरंपरेच्या पुनरुज्जीवनाशी छत्रपती घराण्याचा संबंध असल्याचे धार्मिक व ऐतिहासिक दाखले असल्याचे शिंदे यांनी सांगितले.
त्र्यंबकेश्वर येथील कुंभपरंपरेचे संरक्षण आणि सनातन धार्मिक परंपरांच्या रक्षणासाठी छत्रपतींच्या कार्याची ऐतिहासिक पार्श्वभूमी लक्षात घेणे आवश्यक आहे. त्यामुळे आगामी सिंहस्थ कुंभमेळ्यात छत्रपती शिवाजी महाराजांच्या चरणपादुकांचे पूजन करणे ही केवळ धार्मिक बाब नसून इतिहासाच्या स्मरणाची आणि कृतज्ञतेची कृती ठरेल, असे त्यांनी नमूद केले.
पंढरपूरच्या आषाढी एकादशीच्या शासकीय परंपरेचा संदर्भ देत त्र्यंबकेश्वर सिंहस्थ कुंभमेळ्याच्या धर्मध्वजारोहण कार्यक्रमातही छत्रपती शिवाजी महाराजांच्या चरणपादुकांच्या पाद्यपूजनाचा समावेश करण्यात यावा, अशी मागणी ललिता शिंदे यांनी उपमुख्यमंत्री देवेंद्र फडणवीस आणि महाराष्ट्र शासनाकडे केली आहे.
धर्मध्वजारोहणाच्या कार्यक्रमाला साधू-संत, महंत आणि धार्मिक परंपरांचे प्रतिनिधी उपस्थित असताना त्यांच्या मंत्रोच्चारात छत्रपतींच्या पवित्र चरणपादुकांचे पूजन व्हावे आणि छत्रपती घराण्याच्या वारसांच्या शुभहस्ते हा विधी पार पडावा, अशी कळकळीची विनंती आपण केल्याचे शिंदे यांनी सांगितले.
या उपक्रमाची संकल्पना इतिहासतज्ज्ञ श्री. सतीश सातोणकर यांची असून, ती व्यापक पातळीवर मांडण्याचे काम आपण करत असल्याचे ललिता शिंदे यांनी सांगितले. नव्या पिढीला छत्रपती शिवाजी महाराजांच्या इतिहासातील धर्मरक्षणाची भूमिका समजावी आणि कुंभमेळ्याच्या परंपरेशी संबंधित ऐतिहासिक संदर्भ जतन व्हावेत, हा या मागणी मागील प्रमुख उद्देश असल्याचे त्यांनी स्पष्ट केले.
छत्रपती शिवाजी महाराजांच्या चरणपादुकांच्या पूजनाच्या या मागणीला महाराष्ट्रातील शिवप्रतिष्ठान, शिवप्रेमी संघटना, विविध धार्मिक संस्था, इतिहासप्रेमी आणि नागरिकांनी पाठिंबा द्यावा, असे आवाहन करून त्या म्हणाल्या, संभाजीनगरचे भिडे गुरुजी तसेच महाराष्ट्रातील विविध शिवप्रेमी संघटनांनी या विषयाला व्यापक स्वरूप देण्यासाठी पुढाकार घ्यावा.
सिंहस्थ कुंभमेळा हा केवळ धार्मिक सोहळा नसून महाराष्ट्राच्या सांस्कृतिक आणि ऐतिहासिक परंपरेशी जोडलेला मोठा उत्सव आहे. त्यामुळे छत्रपती शिवाजी महाराजांच्या चरणपादुकांचे पाद्यपूजन धर्मध्वजारोहणाच्या शासकीय कार्यक्रमाचा अधिकृत भाग करण्याच्या मागणीवर राज्य सरकार कोणता निर्णय घेते, याकडे आता शिवप्रेमी, इतिहासप्रेमी आणि धार्मिक क्षेत्राचे लक्ष लागले आहे.
0 Comments
ही कोणत्याही सरकारी योजनेची अधिकृत वेबसाईट नाही. किंवा कोणत्याही शासनाशी संबंधित नाही. कृपया याला official website म्हणून मानू नका आणि खाली कमेंट मधे आपला संपर्क क्रमांक अथवा मोबाईल क्रमांक यासारखी कोणतीही वैयक्तिक माहिती सोडू नका. आम्ही कोणत्याही योजने संदर्भातील तक्रारींवर लक्ष देवू शकत नाही. आम्ही आमच्या सर्व अभ्यागतांना संबंधित तक्रारी, योजनेबाबतच्या चौकशी किंवा संकेतस्थळावर प्रकाशित केलेल्या माहितीसाठी संबंधित विभागाच्या अधिकृत संकेतस्थळावर किंवा संबंधित अधिकाऱ्यांना भेट देऊन खात्री करावी अशी विनंती करीत आहोत . धन्यवाद!