महाराष्ट्र वैद्यकीय परिषदेसाठी गुरुवारी दोन केंद्रांवर मतदान

 

महाराष्ट्र वैद्यकीय परिषदेसाठी

गुरुवारी दोन केंद्रांवर मतदान

जिल्हा प्रशासन सज्ज, प्रत्येक मतदाराला 9 मते देण्याचा अधिकार

सातारा : महाराष्ट्र वैद्यकीय परिषद निवडणूक 2025 जाहीर झाली असून, ही निवडणूक प्रत्येक जिल्ह्याच्या मुख्यालयामध्ये जिल्हाधिकाऱ्यांच्या पर्यवेक्षणाखाली दि. 3 एप्रिल 2025 रोजी गुप्त मतदान पद्धतीने सकाळी 8 ते सायंकाळी 5 घेण्यात येणार आहे. ही निवडणूक घेण्यासाठी प्रशासन सज्ज झाले आहे.

सातारा जिल्ह्यातील मतदान केंद्राचे ठिकाण : जिल्हा रुग्णालय सातारा फिल्ड हॉस्पिटल खोली क्रमांक 1 व खोली क्रमांक 2 मध्ये पार पडणार आहे. एकूण 2 मतदान केंद्र आहेत. सातारा जिल्ह्यात एकूण 1 हजार 884 मतदार असून, मतदान केंद्र क्र 1 येथे अनु क्र 1 ते 951 एकूण 951 मतदार व मतदान केंद्र क्र 2 येथे अनु क्र. 952 ते 1 हजार 884 एकूण 933 मतदार जोडण्यात आलेले आहेत. महाराष्ट्र वैद्यकीय परिषद निवडणूक 2025 साठी दि. 31 डिसेंबर 2024 पर्यंत महाराष्ट्र वैद्यकीय परिषदेकडे नोंदणी झालेले व सदर नोंदणी नूतनीकरण केलेले वैद्यकीय व्यावसायीक हे मतदार आहेत. निवडणूक निर्णय अधिकारी यांनी मतदार यादी प्रसिध्द केली आहे.

प्रत्येक मतदाराला 9 मते देण्याचा अधिकार आहे. एकूण 41 उमेदवार निवडणूक लढवित आहेत. मतदारांना ओळख पटविण्यासाठीचे दस्तऐवज मतदार यादीत ज्यांच्या नावाचा समावेश करण्यात आला असे सर्व वैदयक व्यावसायी व्यक्तीशः मतदान करतील आणि मतदारांची ओळख पटविणे सुकर होण्यासाठी पुढील ओळखपत्रे ग्राह्य धरण्यात येतील.  यामध्ये महाराष्ट्र वैद्यकीय परिषदेकडून देण्यात आलेले नोंदणी प्रमाणपत्र ओळखपत्र किंवा भारत निवडणूक आयोगाचे विधानसभा, लोकसभा निवडणुकीच्या मतदारांसाठी जो ओळखपत्र ग्राह्य धरण्यास मान्यता दिली आहे, अशी छायाचित्रासहित ओळखपत्रे. तसेच नोंदणी प्रमाणपत्रावर छायाचित्र नसल्यास संबधीत मतदाराची ओळख पटविण्यासाठी ज्यावर छायाचित्र आहे असे ओळखपत्र दाखविणे बंधनकारक आहे.

मतदान केंद्रावरील निवडणूक कामकाज होण्यासाठी केंद्राध्यक्ष म्हणून नायब तहसिलदार दर्जाचे अधिकारी व इतर महसूल कर्मचारी असे एकूण 15 कर्मचारी नियुक्त करण्यात आले आहेत. क्षेत्रीय अधिकारी म्हणून डॉ. महेश खलिपे जिल्हा आरोग्य अधिकारी सातारा, समन्वय अधिकारी डॉ. भारती दासवाणी प्राध्यापक औषधशास्र विभाग शासकिय वैद्यकीय महाविद्यालय, सातारा व सातारा जिल्ह्याच्या निवडणुकीचे संपूर्ण कामकाज भगवान कांबळे उपजिल्हा निवडणूक अधिकारी तसेच निवडणूक निर्णय अधिकारी म्हणून श्रीमती शिल्पा किरण परब निबंधक महाराष्ट्र राज्य दंत परिषद मुंबई हे पाहात आहेत.